Kryetari i LDK-së, Lumir Abdixhiku, gjatë një takimi elektoral në Deçan, ka shprehur krenarinë për fushatën e partisë, duke theksuar se përkrahja e qytetarëve ka bërë që LDK të shihet si model për të tjerët.
“Po kuptojmë pse në këtë fushatë të gjithë na kanë zili; të gjithë duan të duken si ne! Aq shumë zili na kanë, sa tani po thonë ‘ne jemi LDK’. Prandaj, le tua bëjmë më të lehtë – le të votojnë drejt, le të votojnë LDK, numrin 124,” deklaroi Abdixhiku.
Ai propozoi një ndryshim simbolik në sloganin e fushatës nga “Bëhu ndryshimi” në “Krejt Kosova LDK,” duke e theksuar vazhdimësinë historike të partisë në betejën për liri, pavarësi dhe demokraci.
Abdixhiku vlerësoi punën e ekipeve lokale dhe përgëzoi kandidatët e Deçanit: Jeton, Armend, Fadil, Hysen dhe Zeqir, duke u uruar suksese në zgjedhjet e 9 shkurtit.
“LDK është trashëgimia e Kosovës, që nga viti 1989 e deri më sot. Përkrahja juaj është garanci për të ardhmen e vendit tonë,” përfundoi ai. /Kosovatimes/
