Koalicioni për Familjen ka hapur fushatën elektorale në Pejë. Eman Rrahmani ka shpalosur programin e kësaj partie që sipas tij fokus ka mbështetjen e familjeve.
“Çdo grua që lind do të mbështetet për 2 vjet me nga 500 euro në muaj, gratë e çiftet që kanë vendosur që të kenë më shumë se 3 fëmijë do të mbështeten me 1000 euro në muaj për 2 vite. Ne do të parandalojmë rrezikun nga humbja e vlerave të familjes”, ka thënë ai.
Ferid Agani, kandidat për deputet nga ky koalicion ka thënë se programi politik i kësaj partie ofron zgjidhje për problemet e familjeve.
“Programi ofron një zgjidhje konkrete për shumë çështje të familjeve kosovare. Duke nisur nga politika për rritjen e natalitetit, ka ardhur koha të dashur qytetarë të reagojmë dhe të kërkojmë nga institucionet e shtetit që ligjet që janë në fuqi për shëndetësi të zbatohen. Ne jemi të vendosur që të ofrojmë sigurime shëndetësore për të gjithë qytetarët”, ka thënë ai.
Ndërkaq Selim Pacolli theksoi se programi i kësaj partie do të ofrohet zhvillim ekonomik e investime në infrastrukturë. /Kosovatimes/
