ZYRA e kryeministrit izraelit Benjamin Netanyahu njoftoi se ai kishte “arritur një marrëveshje për lirimin e pengjeve” të mbajtura në Rripin e Gazës, duke shtuar se një takim i kabinetit të sigurisë ishte planifikuar për më vonë sot.
“Ekipi negociator ka informuar kryeministrin Benjamin Netanyahu se janë arritur marrëveshje për lirimin e pengjeve”, tha zyra e tij në një deklaratë.
Të enjten, zyra e kryeministrit akuzoi Hamasin për braktisjen e pikave kyçe të marrëveshjes për të nxjerrë lëshime të minutës së fundit, gjë që Hamasi e mohoi.
“Kryeministri urdhëroi kabinetin politik dhe të sigurisë që të takohen (të premten). Më pas kabineti do të mblidhet për të miratuar marrëveshjen,” tha zyra e Netanyahut.
Familjet njoftohen
Ai shtoi se familjarët e pengjeve janë njoftuar dhe po bëhen përgatitjet për mirëpritjen e tyre.
Nëse miratohet nga qeveria izraelite, marrëveshja e armëpushimit do të fillojë të dielën dhe do të përfshijë shkëmbimin e pengjeve izraelite për të burgosurit palestinezë. Kushtet për një ndërprerje të përhershme të armiqësive do të finalizohen në një hap të mëvonshëm.
Marrëveshja u njoftua të mërkurën nga ndërmjetësit Katari dhe Shtetet e Bashkuara.
