Nënkryetari i Komitetit të Mbrojtjes të Dumës së Shtetit Rus, Alexei Zhuravlev i bëri thirrje Rusisë që të përgatisë popullsinë e saj mashkullore “për mobilizim të mundshëm”, duke argumentuar se vendet perëndimore mund të jenë gati për të sulmuar Rusinë në tre deri në katër vitet e ardhshme.
“Evropa na thotë se ata do të jenë të gatshëm të luftojnë kundër Rusisë deri në vitin 2028 ose 2029. Ne duhet të trajnojmë njerëzit tanë tani dhe të mbrojmë atdheun tonë”, tha Zhurovlev.
Ai tha se ishte thelbësore të formoheshin rezerva mobilizimi dhe të avancoheshin proceset e angazhimit ushtarak për të trajtuar atë që Zhurovlev e përshkroi si “kërcënime afatgjata nga Perëndimi”.
Ndërsa Zhurovlev pretendoi se Rusia aktualisht “ka mjaft vullnetarë”, ai tha se vendi duhet të planifikojë për të ardhmen, duke përmendur përgatitjet ushtarake në rritje të NATO-s dhe mbështetjen e vazhdueshme për Ukrainën.
Ushtria ruse po përballet me një rënie të konsiderueshme në rekrutimin e ushtarëve dhe vullnetarëve me kontratë për luftën e saj të vazhdueshme, pavarësisht se ofron stimuj dhe përfitime financiare në rritje, duke përfshirë premtimet për faljen e borxheve dhe huave.
Janis Kluge, një studiues në Institutin Gjerman për Çështjet e Sigurisë Ndërkombëtare, vlerësoi në dhjetor se në tremujorin e tretë të 2024, ushtria ruse mobilizoi rreth 700 rekrutë të rinj në ditë, bazuar në të dhënat e buxhetit federal. Kjo shënon një rënie prej gati 30% krahasuar me tremujorin e dytë, gjatë të cilit aplikonin mesatarisht 1020 persona në ditë, për një total prej rreth 92900 rekrutë në tre muaj.
