Lideri i Lidhjes Demokratike të Kosovës (LDK), Lumir Abdixhiku, ka përmbyllur me sukses javën e parë të fushatës elektorale me një tubim entuziast në Miradi e Epërme. Ai falënderoi organizatorët Burim dhe Besnik për angazhimin dhe përkrahjen e jashtëzakonshme që treguan banorët e kësaj zone.
Abdixhiku theksoi energjinë dhe bindjen e fuqishme që po ndjen anembanë Kosovës, duke vlerësuar se populli po dëshmon gatishmërinë për një ndryshim të madh dhe të shumëpritur më 9 shkurt.
“Populli gjithandej në Kosovë po na tregon se fuqia e LDK-së buron tek ata që duan një Kosovë të zhvilluar dhe të drejtë, me mirëqenie dhe mundësi për të gjithë. Bisedat e sinqerta dhe përkrahja e flaktë që po shohim janë dëshmi se Kosova është gati për ndryshimin e shumëpritur,” u shpreh Abdixhiku.
Në qendër të programit të LDK-së, “Rruga e Re,” qëndrojnë zhvillimi ekonomik, mirëqenia sociale dhe krijimi i mundësive për çdo qytetar. Abdixhiku u shpreh i bindur se ekipi i përgatitur i LDK-së do të jetë udhërrëfyes për një Kosovë më të ndritur dhe më të drejtë.
Në përfundim, ai falënderoi banorët e Miradisë së Epërme për përkrahjen dhe përkushtimin e tyre, duke theksuar se ndryshimi vjen vetëm nëse punohet së bashku.
“Ndryshimin e bëjmë bashkë,” ishte mesazhi i tij për qytetarët.
LDK vazhdon me një momentum të fuqishëm, duke mbajtur tubime dhe aktivitete elektorale që po ngjallin shpresë për një të ardhme më të mirë për Kosovën. /Kosovatimes/
