ISRAEL nuk do të vazhdojë me procesin e përfundimit të luftës në Gaza derisa të marrë një listë me 33 pengje që Hamasi duhet të lirojë në fazën e parë të marrëveshjes, tha të shtunën kryeministri izraelit Benjamin Netanyahu.
“Ne nuk do të ecim përpara me marrëveshjen derisa të kemi një listë të pengjeve për t’u liruar, siç është rënë dakord. Izraeli nuk do të tolerojë shkeljet e marrëveshjes. Përgjegjësia e vetme i takon Hamasit,” tha Netanyahu.
Ai po kërkon listat e pengjeve
Qeveria izraelite ka miratuar një marrëveshje me grupin militant palestinez Hamas për një armëpushim dhe lirimin e pengjeve në Rripin e Gazës, tha zyra e kryeministrit Benjamin Netanyahu, një ditë përpara se marrëveshja të ishte planifikuar të hynte në fuqi.
Në orët e para të mëngjesit, pas një seance që zgjati më shumë se gjashtë orë, qeveria ratifikoi një marrëveshje që mund t’i hapte rrugën përfundimit të luftës 15-mujore në enklavën palestineze të kontrolluar nga Hamasi.
Egjipti, një nga ndërmjetësit në arritjen e armëpushimit, njoftoi sot se Izraeli do të lirojë 1890 të burgosur palestinezë në fazën e parë në këmbim të 33 pengjeve izraelitë të mbajtur nga Hamasi.
Armëpushimi gjashtëjavor duhet të hyjë në fuqi nesër, kur do të bëhet i pari nga një seri shkëmbimesh.
