Trajneri i Barcelona, Hansi Flick, ka shprehu zhgënjimin për barazimin me Getafe në La Liga.
Katalanasit nuk kanë arritur të rikthehen te fitorja në La Liga, pasi ndeshja e të shtunës është mbyllur me rezultat 1-1. Kjo ishte ndeshja e katërt radhazi në kampionat ku Barça nuk ia del t’i marrë tri pikë.
“Donim të fitonim dhe kishim mundësi për ta bërë këtë. Jam shumë i zhgënjyer që nuk arritëm të shënonim më shumë gola. Ne krijuam raste, por nuk ishim të saktë. Duhet të vazhdojmë. E përsëris që kishim shanse, veçanërisht në pjesën e parë. Më pas, mendoj se na mungoi pak më shumë saktësi në pasime”, ka deklaruar Flick.
Pavarësisht zhgënjimit, Flick ka thënë se mbetet optimist për të ardhmen e ekipit. “Tani nuk mund të bëj asgjë dhe duhet ta pranoj rezultatin. Por ka ende një rrugë të gjatë dhe ne do të luftojmë deri në fund për të fituar LaLiga. Humbëm dy pikë, por fituam një, kështu që duhet të shikojmë përpara dhe të përpiqemi të përmirësohemi në të ardhmen”, ka theksuar ai.
Pas këtij rezultati, Barcelona renditet në vendin e tretë me tridhjetë e nëntë pikë, katër pikë prapa Real Madrid që mban vendin e dytë dhe pesë pikë larg Atletico Madrid që kryeson.
