TIKTOK ka njoftuar se po rikthen shërbimet për 170 milionë përdorues amerikanë pasi Presidenti i zgjedhur Donald Trump tha se do të vononte ndalimin e aplikacionit kur të marrë detyrën nesër.
Sot, aplikacioni në pronësi kineze pushoi së funksionuari për përdoruesit amerikanë. Ndalimi u nxit nga shqetësimet se të dhënat e tyre mund të aksesoheshin nga zyrtarët kinezë. TikTok njoftoi këtë mbrëmje se është në proces të “kthimit të shërbimit”, vetëm disa orë pas mbylljes së aksesit për përdoruesit në SHBA.
Ata falënderuan Trumpin
Ata falënderuan presidentin e zgjedhur për “dhënien e qartësisë dhe sigurisë së nevojshme” dhe thanë se do të punonin me Trump “për një zgjidhje afatgjatë që do ta mbajë TikTok në Shtetet e Bashkuara”.
Kujtojmë se Trump tha sot se nesër, në ditën e tij të parë në detyrë, ai do të nënshkruajë një urdhër ekzekutiv për të lejuar që TikTok të vazhdojë përkohësisht operimin në SHBA, ndërsa sugjeroi që qeveria amerikane mund të marrë pronësinë e pjesshme të rrjetit social.
Trump tha në një postim në Truth Social, rrjetin e tij social, se ai “nuk do të lejojë që TikTok të mbetet në errësirë” pasi të marrë detyrën nesër. TikTok, në pronësi të kompanisë kineze ByteDance, ndaloi së punuari për 170 milionë përdoruesit e saj në SHBA sot, edhe para se të hynte në fuqi ligji që e ndalonte.
Pse është e ndaluar në Amerikë?
Vazhdimi i funksionimit të aplikacionit është çaktivizuar për shkak të frikës se zyrtarët kinezë mund të keqpërdorin të dhënat dhe informacionin amerikan. Përdoruesve u shfaqet një mesazh paralajmërues që thotë se shërbimet e TikTok janë “përkohësisht të padisponueshme”.
Gjykata e Lartë e SHBA miratoi dje një ligj që kërkon që ByteDance, pronari i TikTok, të shesë aplikacionin popullor të përdorur nga gati gjysma e amerikanëve ose do të ndalohet sot në vend për shkak të shqetësimeve të sigurisë kombëtare.
Çfarë thotë Trump?
“Të hënën, unë do të nënshkruaj një urdhër ekzekutiv që vonon ndalimin ligjor në mënyrë që të mund të bëjmë një marrëveshje për të mbrojtur sigurinë tonë kombëtare. Me urdhër, ne gjithashtu do të konfirmojmë se nuk do të ketë përgjegjësi për asnjë kompani që ndihmoi TikTok të mbyllej përpara urdhër”, shkroi Trump në njoftim.
Trump ka sugjeruar që SHBA-ja mund të marrë një “50% pozitë të pronësisë” në TikTok si pjesë e një sipërmarrjeje të përbashkët, duke sugjeruar se kjo mund të nënkuptojë të punosh me kompaninë mëmë ByteDance.
“Duke bërë këtë, ne po e shpëtojmë TikTok-un, po e mbajmë në duar të mira dhe po e lëmë të thotë fjalën e vet. Pa miratimin e SHBA-së, nuk ka Tik Tok. Me miratimin tonë, ai vlen qindra miliarda dollarë – ndoshta triliona (mijëra miliarda, op.a.),” shkroi Trump, i cili më parë tha se po konsideronte një vonesë prej tre muajsh në ndalimin e TikTok.
