Komuna e Podujevës ka njoftuar se kryetari i Komunës, Shpejtim Bulliqi, ka nënshkruar marrëveshje me drejtorin e BERZH-it në Kosovë, Sergiy Maslichenko dhe kryeshefin e KRU “Prishtina”, Arsim Fetahu për ndërtimin e imipiantit të ujërave të zeza.
Sipas njoftimit, vlera e këtij projekti është 35 milionë euro, ku 25 milionë janë kredi nga BERZH-i (kthimin e mjeteve e bën Qeveria e Kosovës), kurse 10 milionë të tjerë sigurohen nga Korniza Investive e Bashkimit Evropian për Ballkanin Perëndimor.
Kryetari Bulliqi e vlerësoi si ditë të rëndësishme për Komunën e Podujevës nënshkrimin e kësaj marrëveshjeje.
“Me ndërtimin e këtij impianti, jo vetëm që do të trajtojmë ujërat e zeza sipas standardeve bashkëkohore, por edhe do të kontribuojmë në reduktimin e ndotjes së lumenjve dhe mbrojtjen e burimeve ujore”, tha Bulliqi, thuhet në njoftimin e komunës.
Projekti realizohet në bashkëpunim me Qeverinë e Kosovës, Bankën Evropiane për Rindërtim dhe Zhvillim (BERZH) dhe Kompaninë Rajonale të Ujësjellësit “Prishtina”.
Në ceremoninë e nënshkrimit të marrëveshjes të pranishëm ishin kryetari i Komunës, Shpejtim Bulliqi, ministri i Financave, Hekuran Murati, zëvendësministri i Ekonomisë, Getoar Mjeku, drejtori i BERZH-it në Kosovë, Sergiy Maslichenko dhe kryeshefi i KRU “Prishtina”, Arsim Fetahu.
