Kandidati i Lidhjes Demokratike të Kosovës për kryeministër, Lumir Abdixhiku, para elektoratit të tij në Podujevë fjalimin e nisi me kërkesën për duartrokitje, për nder të jetës dhe veprës së themeltarit të LDK-së, Ibrahim Rugova.
Abdixhiku para llapjanëve premtoi që vizita e parë e tij do të jetë në Washington të SHBA-së, me kërkesë të parë që Kampi Bondstel të jetë kamp i përhershëm në Kosovë.
“Siç na ka mësuar shqiptari më i madh i të gjitha kohërave Ibrahim Rugova, shtëpia nuk mbahet pa miq. Nga këtu ju them Zoti lartë, Amerika në tokë, në tokën tonë, Republikën e Kosovës”.
Në Llap, Abdixhiku tha se programi i tyre politik ka 5 miliardë euro investime, 5 për qind rritje ekonomike e 5 miliardë buxhet.
“80 mijë punëtorëve që në javën e parë do tua rrisim koeficientin në 150, një javë dhe asnjë ditë më shumë se kaq. Të gjithë pensionistëve, ata të lënë në mëshirën e fatit, në harresë asnjë pension më i ulët se 150 euro, rritje prej 35 për qind për çdo pension dhe barëra falas. Fëmijët me mësim gjithë ditor.
LDK do të themelojë për herë të parë Ministrinë e Familje, “për një të porsalindur përgjatë një viti do te mbulojmë te gjitha shpenzimet”.
Ekrem Hyseni, kryetar i Degës së LDK-së në Podujevë, premtoi transformim të qytetit, mbështetje e subvencione për bujqit, ndërtimin e spitalit në Podujevë e ngrohtore të qytetit. Ai tha se llapjanët janë të vendosur tashmë për Lumir Abdixhikun kryeministër.
“Llapjanët janë të vendosur tashmë për Lumir Abdixhikun kryeministër. Çdo ditë nuk do të ndalemi që ta transformojmë qytetin tonë”.
Në këtë tubim u prezantuan edhe kandidatët e LDK-së së Podujevës të cilë garojnë për deputetë të Kuvendit të Kosovës.
