Policia e Kosovës ka bërë të ditur se dy persona janë arrestuar në lidhje me rastin e një vjedhjeje të rëndë të ndodhur më 23 tetor 2024, ku ishte raportuar vjedhja e një veture BMW X-5 me targa vendore në rrugën magjistrale Kaçanik-Ferizaj.
Pas hetimeve të gjata dhe grumbullimit të informacioneve, policia ka arritur të identifikojë dhe të arrestojë dy të dyshuar. Sipas komunikatës nga Drejtoria Rajonale e Policisë në Ferizaj, i dyshuari i parë, P.L., 35 vjeç, është arrestuar më 17 janar 2025.
“Me vendim të prokurorit të shtetit, i dyshuari është ndaluar për 48 orë për procedura të mëtejshme hetimore,” thuhet në njoftim.
Sot, më 21 janar 2025, është arrestuar edhe personi i dytë i përfshirë në rast, F.L., 28 vjeçe.
“E dyshuara është shoqëruar në stacionin policor të Kaçanikut, ku pas intervistimit dhe me vendim të Prokurorit të Shtetit, ajo është ndaluar për 48 orë,” deklaron policia.
Policia e Kosovës njofton se po vazhdon me hetimet për të ndriçuar plotësisht rastin dhe për të zbuluar çdo të përfshirë tjetër.
