Barcelona ka arritur fitore ndaj Benfica në një ndeshje dramatike ku janë shënuar nëntë gola, ndërsa fitore kanë marrë edhe Atletico Madrid ndaj Bayer Leverkusen dhe Liverpool kundër Lille.
Të martën janë zhvilluar nëntë ndeshje të Javës së shtatë në Champions League.
Ndeshja mes Benfica dhe Barcelona në “Estadio da Luz” ka qenë diçka e paimagjinueshme edhe për optmistët më të mëdhenj të ndeshjeve me shumë gola, ku në fund fituese ka dalur skuadra katalanase me rezultat 4-5.
Pavlidis ka kaluar vendasit në epërsi që në minutën e dytë, por Lewandowski është përgjigjur dhjetë minuta më vonë me një gol nga penalltia. Megjithatë, Pavlidis nuk është ndalur dhe ka kompletuar një “hat-trick” me dy gola të tjerë në minutat njëzet e dy dhe tridhjetë, duke mbyllur pjesën e parë me avantazh 3-1 për portugezët.
Barcelona ka reaguar në pjesën e dytë. Në minutën e gjashtëdhjetë e katërt, Raphinha e ka ngushtuar diferencën, por një gabim i Araujo ka çuar në një tjetër gol për vendasit në minutën e gjashtëdhjetë e tetë.
Kur rezultati ka qenë 4-2, është menduar se Barça ka pësuar disfatë, por një mendim të tillë nuk e kanë pasur edhe lojtarët në fushë. Lewandowski ka shënuar sërish nga penalltia në minutën e shtatëdhjetë e tetë, ndërsa Garcia ka barazuar në minutën e tetëdhjetë e shtatë.
Kur gjithçka dukej e mbyllur me një barazim dramatik, Raphinha ka shënuar në minutën e fundit të kohës shtesë për t’i dhënë Barcelonës fitoren.
Ndërkohë në “Metropolitano” Atletico Madrid ka regjistruar një fitore 2-1 ndaj Bayer Leverkusen. Gjermanët kanë kaluar në avantazh në fund të pjesës së parë, kur Hincapie ka shënuar në kohën shtesë. Atletico e ka vendosur baraspeshën në pjesën e dytë me një gol nga Alvarez në minutën e pesëdhjetë e dytë. Në minutën e nëntëdhjetë, i njëjti futbollist ka shënuar golin vendimtar për fitoren e vendasve.
Në ndeshjen tjetër të mbrëmjes, Liverpool ka mposhtur Lille me rezultatin 2-1 në “Anfield”. Mohamed Salah ka hapur serinë e golave në minutën e tridhjetë e katërt, por Lille ka barazuar me një gol të David në minutën e gjashtëdhjetë e dytë. Vetëm pesë minuta më vonë, Elliott ka shënuar golin e fitores për “Të kuqtë”.
REZULTATE E TË GJITHA NDESHJEVE:
