Në margjinat e Forumit Ekonomik Botëror, kryeministri i Kosovës, Albin Kurti, zhvilloi një takim bilateral me Kryeministrin e Lituanisë, Gintautas Paluckas.
“Ju uroj për detyrën dhe fitoren në zgjedhjet e fundit,” tha kryeministri Kurti, duke falënderuar homologun e tij për mbështetjen e Lituanisë ndaj Kosovës.
“Jemi mirënjohës për përkrahjen tuaj, veçanërisht në fushën e sigurisë përmes kontributit në KFOR dhe EULEX, si dhe për ndihmën tuaj në aspiratat tona për anëtarësim në organizatat ndërkombëtare”, theksoi ai.
Duke folur për përparimin e Kosovës, Kurti tha se Kosova tashmë ka aplikuar për anëtarësim në BE dhe nevojiten hapa të rëndësishëm tutje. “Rritja ekonomike dhe avancimi demokratik i Kosovës në katër vitet e fundit janë dëshmuar nga rankimet e larta në indekse ndërkombëtare”, shtoi kryeministri.
Gjatë takimit, u diskutua edhe situata gjeopolitike dhe siguria në rajon e Evropë.
“Republika e Kosovës dënon agresionin rus ndaj Ukrainës dhe është rreshtuar me partnerët ndërkombëtarë në vendosjen e sanksioneve ndaj Rusisë,” tha Kurti.
Kurti e falënderoi Kryeministrin Paluckas për takimin dhe bisedën në shërbim të thellimit e fuqizimit të mëtejmë të marrëdhënieve e bashkëpunimit dypalësh. /Kosovatimes/
