Shkruan: Gurakuqi KUÇI
Sot, institucionet e sigurisë në Kosovë kanë zbuluar një kamerë të fshehur për monitorim, të maskuar brenda një kutie metalike dhe të vendosur në një shtyllë elektrike. Kjo pajisje kishte për qëllim ndjekjen e lëvizjeve në një udhëkryq të rëndësishëm strategjik dhe transmetimin e pamjeve drejtpërdrejt në Serbi.
Ky zbulim tregon përpjekjet e vazhdueshme të Serbisë për të ndërhyrë në çështjet e brendshme të Kosovës dhe për të ruajtur ndikimin e saj përmes mjeteve hibride. Pajisje të tilla janë përdorur për të ndjekur dhe mbledhur informacione që mund të shërbejnë për të planifikuar akte destabilizuese, siç ishte sulmi në Zveçan dhe ndërhyrjet në strukturat vitale të vendit.
Serbia ndodhet në një situatë gjithnjë e më të ndërlikuar:
1️⃣ Dobësimi i strukturave paralele: Për shkak të rritjes së kontrollit nga institucionet e Kosovës, Serbia po detyrohet të kalojë në forma të tjera të ndërhyrjes.
2️⃣ Kriza e brendshme: Protestat e mëdha kundër regjimit të Vuçiqit po ndikojnë në stabilitetin e tij politik dhe e kanë shtyrë regjimin të kërkojë mënyra për të shmangur vëmendjen nga problemet e brendshme.
3️⃣ Goditja ekonomike: Sanksionet e SHBA-së ndaj industrisë së naftës (NIS), e lidhur me Rusinë, po thellojnë presionin ekonomik mbi regjimin serb.
Këto rrethana kanë bërë që Serbia të intensifikojë përpjekjet për të eksportuar kriza rajonale, duke përdorur taktika të ndryshme për të shpërqendruar vëmendjen e qytetarëve të saj nga problemet e brendshme dhe për të ruajtur, regjimin aktual.
Siguria dhe ndalja e eksportimit të destabilizimit nga Serbia në Kosovë dhe rajon, e dobëson regjimin e Vuçiqit dhe e forcon interesin e serbëve për dalje nga provicializimi dhe “çlirimi nga Kosova”.
