Nënkryetari i Prishtinës, Alban Zogaj, së bashku me Drejtorin e Planifikimit, Arbër Gecin, kanë nënshkruar sot me nder deklaratën e fillimit të konkursit arkitektonik ndërkombëtar për dizajnimin e “Parkut Përkujtimor Dr. Ibrahim Rugova dhe Bibliotekës Presidenciale”.
Ky projekt ambicioz pritet të kthehet në një pikë referimi kombëtar, duke përfaqësuar vlerat e Kosovës dhe duke ruajtur kujtimin për vizionarin dhe liderin historik, Dr. Ibrahim Rugova. Në të njëjtën kohë, hapësira do të shërbejë si një qendër e rëndësishme e dijes dhe kulturës për brezat e ardhshëm.
“Me këtë projekt ne synojmë jo vetëm të nderojmë trashëgiminë e Dr. Rugovës, por edhe të krijojmë një simbol të unitetit, kulturës dhe arsimit në kryeqytet,” deklaroi Zogaj.
Autoritetet ftojnë arkitektët më të shquar nga e gjithë bota të sjellin vizionet e tyre për këtë projekt të veçantë, duke kontribuar në realizimin e një hapësire që mishëron historinë dhe trashëgiminë intelektuale të Kosovës.
Procesi i konkursit do të jetë transparent dhe i hapur për të gjithë, duke synuar të transformojë këtë zonë në një simbol të përhershëm të identitetit kombëtar dhe kulturor. /Kosovatimes/
