Ministri i Mbrojtjes, Ejup Maqedonci, ka sqaruar publikisht se letra e dërguar Komandantit të KFOR-it për ngjarjen e 24 nëntorit 2024, kur Garda Ceremoniale ishte angazhuar në një ceremoni mortore në veri të Kosovës, nuk përbën rizotim, por vetëm një sqarim të rrethanave.
Maqedonci tha se qëllimi i letrës ishte informimi i Komandantit të KFOR-it për arsyet dhe rrethanat e angazhimit të një njësie të Forcës së Sigurisë së Kosovës (FSK) në atë zonë, duke theksuar se nuk kishte për qëllim tensionimin e situatës. Ai gjithashtu konfirmoi se për angazhimin e FSK-së në veri të Kosovës vazhdon të zbatohet zotimi i vitit 2013, i dhënë nga ish-Kryeministri Hashim Thaçi për Sekretarin e Përgjithshëm të NATO-s, i cili përcakton kushtet e operimit dhe koordinimit mes FSK-së dhe KFOR-it.
“Unë personalisht nuk pajtohem me atë zotim, pasi besoj se ka qenë i gabuar dhe me pasoja afatgjata për ushtrinë tonë. Megjithatë, si institucion i përgjegjshëm, ne do ta respektojmë për aq kohë sa ai mbetet në fuqi,” deklaroi Maqedonci.
Ai shtoi se përgjegjësia e tij dhe e Komandantit të KFOR-it është të sigurojnë që çdo veprim ushtarak në veri të Kosovës të realizohet në mënyrë të koordinuar, duke shmangur çdo keqkuptim apo tension të panevojshëm.
“Respektimi i obligimeve të trashëguara është domosdoshmëri, ndërsa koordinimi garanton paqen dhe stabilitetin,” përfundoi Maqedonci. /Kosovatimes/
