Presidentja e Kosovës, Vjosa Osmani, ka shprehur ngushëllimet e saj të sinqerta pas lajmit të hidhur për ndarjen nga jeta të gazetares ukrainase Olha Pridako, e cila jetonte në Prishtinë prej dy vitesh.
Në një mesazh publik, Presidentja Osmani e përshkroi Olhën si një zë të guximshëm të gazetarisë dhe një simbol të forcës e qëndresës në kohë të vështira.
“Prania e saj në Kosovë, së bashku me djalin e saj Yaroslavin, ishte një shembull i shpirtit human dhe vlerës së lirisë, që i lidh popujt tanë. Kujtimi për Olhën do të mbetet gjithmonë në mendjet dhe zemrat tona,” deklaroi Presidentja Osmani.
Ajo u shprehu ngushëllime të thella familjarëve të Olhës, kolegëve të saj në Prishtinë dhe të gjithë atyre që e njohën e vlerësuan punën e saj.
Olha Pridako ishte një gazetare e njohur për guximin e saj dhe përkushtimin ndaj vlerave të lirisë e së vërtetës. Ajo jetonte në Prishtinë së bashku me djalin e saj, duke ndarë lidhje të forta me popullin e Kosovës.
Ngjarja e ndarjes së saj nga jeta ka prekur zemrat e shumë njerëzve në Kosovë dhe Ukrainë, duke lënë pas një trashëgimi të respektuar e të paharruar. /Kosovatimes/
