Kryetari i Lidhjes Demokratike të Kosovës (LDK), Lumir Abdixhiku, ka vizituar fshatin Barileva, një periferi e Prishtinës, në kuadër të takimeve elektorale për promovimin e programit të tij politik “Rruga e Re.”
Abdixhiku e përshkroi pritjen në Barilevë si të jashtëzakonshme, duke theksuar mbështetjen e fortë dhe entuziazmin e banorëve, të cilët e konsideroi si një frymë të ndryshimit.
“Familjet punëtore të Barilevës, si dhe çdo lokacion tjetër i Kryeqytetit, do të përfitojnë më së shumti nga programi ynë ‘Rruga e Re’. Me 1.5 miliardë euro investime në vetëm 4 vjet, ekonomia e Prishtinës do të rigjallërohet siç e ka merituar gjithherë,” tha Abdixhiku.
Ai shtoi se ky moment pozitiv është dëshmi e një fryme të re që po përhapet në mbarë vendin dhe falënderoi banorët për mikpritjen e tyre.
“Faleminderit Barilevë. Donjetë, Ismet e Fadil, vazhdoni punën e mirë!” përfundoi ai.
LDK synon të sjellë ndryshime rrënjësore në kryeqytet përmes projekteve të mëdha infrastrukturore dhe rigjallërimit ekonomik duke synuar një rritje të përfshirjes qytetare dhe zhvillimit të barabartë për të gjitha zonat e Prishtinës. /Kosovatimes/
