Zyrtarët e doganës në Francë kanë paralajmëruar qytetarët që të mos konsumojnë të ashtuquajturin mjaltë afrodiziak, mjaltë i importuar ilegalisht i përzier me ilaçe për trajtimin e disfunksionit erektil, raporton CNN . Paralajmërimi u publikua pardje pasi doganierët raportuan sekuestro rekord gjatë vitit 2024 dhe në përgjithësi në vitet e fundit.
Një nga incidentet përfshin zbulimin e 860,000 produkteve me peshë totale 13 tonë metrikë, të gjetura në portin e Marsejës, në një dërgesë nga Malajzia në nëntor. Në hetimin e dytë u sekuestruan më shumë se 238 kilogramë produkte në hapësirën e magazinimit.
Disfunksioni erektil është një gjendje e përcaktuar si pamundësia për të arritur ose mbajtur një ereksion mjaftueshëm për marrëdhënie seksuale. Mund të trajtohet me barna, por përdorimi i tyre është i kufizuar në vende si Franca, ku mjekët duhet t’i përshkruajnë ato.
Klientët nuk janë të vetëdijshëm për rreziqet”
Sipas doganave, produktet e falsifikuara të mjaltit vijnë më shpesh nga Malajzia, Turqia dhe Tunizia, në sasi të mëdha në anije me kontejnerë ose në sasi më të vogla të blera online. Produktet me emra si Black Horse dhe Bio Max shiten ilegalisht në vende si klubet e natës dhe në formën e pijeve dhe ëmbëlsirave, me premtime të rreme për përfitime shëndetësore. “Klientët dhe përdoruesit nuk janë në dijeni ose nënvlerësojnë rreziqet e mundshme të këtyre produkteve”, thanë zyrtarët doganorë.
Analizat laboratorike zbuluan përbërës aktivë në mjaltë, si sildenafil dhe tadalafil, të cilët përdoren për trajtimin e disfunksionit erektil. Sasia e përbërësit aktiv që përmbahet në secilën dozë nuk ishte e specifikuar dhe nuk u përmendën efektet anësore ose kundërindikacionet e mundshme, paralajmëruan zyrtarët. “Konsumatorët janë të ekspozuar ndaj rreziqeve të konsiderueshme”, thuhet në njoftimin për shtyp.
Disfunksioni erektil është më i zakonshëm tek meshkujt e moshuar dhe shpesh i atribuohet niveleve të ulëta të testosteronit, hormoni kryesor seksual që është kritik për zhvillimin e indeve riprodhuese mashkullore, rritjen e muskujve, masën kockore dhe qimet e trupit. Megjithatë, medikamentet për mosfunksionimin erektil mund të përdoren gjithashtu për të luftuar efektet e substancave të tilla si alkooli, nikotina dhe marihuana, të cilat janë gjetur se ndikojnë negativisht në funksionin seksual.
