Koalicioni “Për Kosovën Fituese” (Aleanca për Ardhmërinë e Kosovës, Nisma Socialdemokrate, Lista Konservatore dhe Forumi Intelektual E-30) ka zhvilluar takim me banorët e Bllacës, të cilëve u kanë premtuar angazhim në fushat për të cilat ka nevojë kjo zonë.
Lideri i Nisma Socialdemokrate, njëherësh kandidat për deputet, Fatmir Limaj, në tubimin e mbajtur në fshatin Bllacë, u premtoi banorëve se do të angazhohet me punë e vepra për të mirën e Kosovës.
“Ne vijmë para jush për të thënë se asnjëherë më shumë s’ka pasur nevojë për t’u bashkuar Kosova. Vijmë para jush për t’ju thënë se Kosova ka nevojë për zëra racionalë, për burra e gra intelektualë që vijnë për ta futur Kosovën në punë… Kosova nuk ka nevojë për përçarje e përplasje,” tha Limaj.
Në këtë tubim elektoral të koalicionit AAK – Nisma Socialdemokrate, para banorëve kanë kërkuar votë kandidatët për deputet nga kjo zonë, ndërsa kanë premtuar angazhim në fushat që, sipas tyre, janë të nevojshme për këtë zonë.
“Koalicioni për Kosovën Fituese vazhdon përpjekjet për trajtim dinjitoz të veteranëve dhe familjeve të dëshmorëve. Nisma është angazhuar për zhvillimin e fshatrave tona, bujqësi, shëndetësi dhe mundësi punësimi për të rinjtë dhe të rejat,” tha kryetarja e degës së Nisma Socialdemokrate, Jehona Rrafshi Lumi.
“Kemi qenë bashkë dhe jemi bashkë. E gjithë e kaluara jonë është bashkë. Me përgatitjen time profesionale, do t’ju bëj nder juve dhe Kosovës. Miratimin e ligjit për punë, ligjit pensional dhe sigurimit shëndetësor, si dhe pjesëmarrjen në miratimin e buxhetit nuk do ta ndajmë asnjëherë pa e përfshirë komunën e Suharekës,” tha Murtez Zekolli, kandidat për deputet.
Ndërsa kandidati për deputet nga Nisma Socialdemokrate, Gani Bajraktari, tha se koalicioni për Kosovën Fituese ka një planprogram të qartë, ndërsa lideri i saj, Fatmir Limaj, prodhon vepra. Ai shtoi se shumë sektorë, si shëndetësia dhe arsimi, kanë nevojë për ristrukturim.
