Lëvizja Vetëvendosje ka bërë thirrje për një mobilizim masiv për të arritur një pjesëmarrje rekord të grave dhe vajzave në zgjedhje, duke u angazhuar për promovimin e kandidateve femra në listën e saj zgjedhore.
“Gratë dhe vajzat në Lëvizjen Vetëvendosje kanë një rol të pazëvendësueshëm. Puna e tyre e vazhdueshme ka sjellë një transformim tërësor në angazhimin politik të grave dhe vajzave,” thuhet në deklaratën e VV-së.
Në këto zgjedhje, Vetëvendosje në bashkëpunim me Partinë Guxo dhe Alternativën, ka propozuar 41 gra kandidate, përfshirë veterane të UÇK-së, anëtare të familjeve të dëshmorëve, ekonomiste, juriste, artiste, sportiste dhe profesioniste të fushave të tjera. Në 20 vendet e para të listës janë përfshirë 10 gra dhe 10 burra.
“Ngase ne besojmë se për të bërë progres të vërtetë në Kosovë, gratë dhe vajzat duhet të mbështeten nga shteti pa kursim. Kemi dëshmuar se si buxheti për sportin, artin, shëndetësinë, arsimin dhe mbështetjen e biznesit bëhet i plotë kur përfshihen gratë dhe vajzat,” thekson Vetëvendosje. /Kosovatimes/
