Paneli Zgjedhor për Ankesa dhe Parashtresa ka vazhduar me gjobat ndaj partive politike për shkeljet gjatë fushatës zgjedhore. PZAP-ja ka publikuar në faqen zyrtaret vendimet e marra më 25 janar.
Paneli Zgjedhor për Ankesa dhe Parashtresa e ka gjobitur sërish Koalicioni për Familje. PZAP-ja ka gjobitur këtë koalicioni me 5000 euro pas ankesës së bërë nga organizata joqeveritare “CEL Kosova dhe Dylberizmi”.
Gjithashtu, PZAP-ja ka gjobitur Lëvizjen Vetëvendosje me 4000 euro shkaku i një videoje të postuar në TikTok nga kandidati nga radhët e kësaj partie Valon Ramadani. Ankesa ishte parashtruar nga PDK-ja.
Edhe PDK-ja është gjobitur me 6000 euro, në dy raste të ndryshme.
Në rastin e parë është gjobitur me 3000 euro për shkak të një postimi në Facebook të kandidatit Faruk Bojaxhi e ku ka përdorur objekte fetare, edhe në rastin e dytë është gjobitur me 3000 euro për vendosje të banerave nëpër rrugë, hapësira publike dhe shtylla ndriçuese në Suharekë.
PZAP-ja e ka gjobitur LDK-në me 4000 euro për vendosje të banerave në hapësira publike në Suharekë. Gjithashtu edhe Partia e Serbëve të Kosovës është gjobitur me 3500 euro për vendosje të banerave e posterëve në hapësira publike në Mitrovicë të Veriut.
