Një aksident i rëndë trafiku ka ndodhur në magjistralen Mitrovicë-Pejë, konkretisht në fshatin Çubrel, ku tre persona kanë humbur jetën.
Rastin e ka bërë të ditur, kryetari i Komunës së Skënderajt, Fadil Nura.
“Sapo u njoftuam për një aksident me fatalitet të ndodhur në rrugën magjistrale Mitrovicë – Pejë, përkatësisht në fshatin Çubrel, ku për pasojë tre persona kanë vdekur. Lutemi për të dhe për të aksidentuarit e tjerë”, ka shkruar Nura në Facebook.
Kryetari i Skënderajt shprehu ngushëllime familjeve të viktimave.
Ndërkohë, rastin e ka konfirmuar edhe Policia e Kosovës përmes një komunikate, e ku është bërë e ditur se aksidenti ka ndodhur mes një veture zyrtare të policisë dhe një veture civile.“Sonte rreth orës 18:40, është raportuar për aksident trafiku me pasoja fatale, i cili ka ndodhur në rrugën rajonale Mitrovicë-Pejë, segmenti rrugor në fshatin Çubrel të Skënderajt. Në këtë aksident janë përfshira dy vetura, njëra prej tyre veturë zyrtare e policisë. Si pasojë e aksidentit, bazuar në informacionet e siguruara kanë humbur jetën tre persona civil, përderisa lëndime kanë pësuar edhe pesë persona tjerë, katër prej tyre zyrtarë policor”, thuhet në njoftimin e policisë.
Tutje theksohet se njësitë policore dhe stafi menaxhues kanë dal në vendin e ngjarjes, ndërsa për hetimet dhe shkaqet e aksidentit po merren hetuesit e njësitit rajonal të trafikut rrugor.
“Lidhur me rastin janë njoftuar institucionet kompetente, IPK-ja dhe Prokurori kompetent të cilët pritet të dalin në vendin e ngjarjes”, thuhet tutje në njoftim. /Kosovatimes/
