Policia e Prizrenit ka intensifikuar masat për sigurinë në trafik, duke shqiptuar 1700 gjoba për kundërvajtje në periudhën 20-26 janar 2025.
Njësia Rajonale e Komunikacionit Rrugor dhe stacionet policore kanë vepruar në katër komuna të rajonit, në kuadër të planit operativ “Siguria në trafikun rrugor.”
“Këto masa synojnë parandalimin e aksidenteve dhe rritjen e sigurisë në rrugë,” njofton Policia Rajonale e Prizrenit.
Gjatë kësaj periudhe janë hetuar 14 aksidente me të lënduar dhe 24 aksidente me dëme materiale. Gjithashtu, janë ndaluar katër drejtues mjetesh për shkelje të rënda të ligjit. Realizimi i urdhëresave gjyqësore Policia e Prizrenit ka zbatuar edhe 55 urdhëresa të Gjykatave Themelore për vepra të ndryshme penale.
“Do të vazhdojmë të veprojmë ndaj personave që nuk u janë përgjigjur thirrjeve të gjykatës,” thekson policia. Qytetarët inkurajohen të bashkëpunojnë me organet e rendit, duke raportuar çdo informacion në stacionet policore, përmes aplikacionit “Lajmëro Policinë” ose në numrin 192.
“Prania jonë në terren do të jetë maksimale për të parandaluar aksidentet, sidomos ato me fatalitet,” përfundon komunikata. /Kosovatimes/
