Kandidati për kryeministër nga Partia Demokratike e Kosovës, Bedri Hamza, ka thënë se Kosova mundet më mirë vetëm me këtë subjekt politik, që sipas tij, garanton rritje pagash 50% për të gjitha kategoritë. Ai tha se vizioni i partisë së tij është zhvillimi ekonomik.
Këto premtime Hamza i bëri në fshatin Shipol të Mitrovicës.
“Vizioni ynë është për një Kosovë me progres, me zhvillim të qëndrueshëm. Kemi me i mbështet bizneset me reforma në pjesën fiskale, me punësime në sektorin privat e themelim të Gjykatës së Punës. Do të krijojmë edhe Fond të papunësisë. Kemi me i rritë pagat qysh në muajin e parë 50% për të gjitha kategoritë, kurse 70% rritje të pensioneve, invalidëve e veteranëve”, tha ai.
Hamza takimet i vazhdoi edhe me qytetarët e lagjes “Iliridë” të Mitrovicës. Nga aty, Hamza theksoi angazhimin e tij për të mbështetur punësimin edhe të grave dhe vajzave teksa premtoi edhe bursa për studentë.
“Vizioni ynë është zhvillimi ekonomik. Të rinjtë dhe të rejat ta shohin të ardhmen këtu. Në qeverisjen time nuk do të këtë vajzë ose djalë pa pasur mundësinë e shkollimit. 25 milionë euro do të ketë bursa për studentë. Do të ketë investime në çerdhe, rrugë e projekte tjera në Mitrovicë”, tha ai.
Hamza shtoi se do të këtë edhe dyfishim të buxhetit për barnat esenciale.
