Nesër në orën 9:00 do të mblidhet sërish Kuvendi Komunal i Gjilanit në përpjekje për ta votuar, në parim, buxhetin e Komunës. Udhëheqja aktuale e kësaj komune i ka bërë thirrje opozitës që të vijë nesër në mbledhjen e Kuvendit dhe ta votojë këtë buxhet, në mënyrë që të tejkalohen sfidat dhe vështirësitë të cilat janë shkaktuar për qytetarët e kësaj komune.
Pushteti i Gjilanit ka kërkuar nga opozita që ta mbështesë në parim miratimin e buxhetit të Komunës së Gjilanit, duke thënë se është detyrim moral karshi qytetarëve të kësaj komune.
“Duke refuzuar këtë buxhet kemi vendosur që ti privojmë qytetarët nga investimet për përmirësimin kushteve të jetesës për zhvillimin e infrastrukturës, për shërbime të shëndetësisë, arsimit, shërbimeve publike e kështu me radhë”, tha Leonora Bunjaku- Morina, zëvendëskryetare e Gjilanit.
Zyrtarët komunalë thonë se kanë vështirësi në implementim të procesit të arsimit.
“Duke filluar nga nënshkrimi i kontratave për transportin e nxënësve e kemi të pa mundur, edhe pse prokurimi e ka kryer punën e tij, sepse ne nuk kemi fonde të mjaftueshme për të nënshkruar këtë kontratë gjithashtu nënshkrimi i kontratës për furnizim me pelet”, tha Shend Nuhiu, drejtor në Drejtorinë e Arsimit në Gjilan.
Sipas pushtetarëve të komunës, nëse ky buxhet nuk miratohet, pasojat e tij do t’i ndjejnë qytetarët. Komunarët thanë se nesër do të mblidhet kuvendi komunal për të bërë përpjekje që të tejkalohet kjo sfidë.
