Shkruan: Florim ZEQA
Kaluan dy javë të fushatës zgjedhore, i përcollëm 14 ditë dhe net të njëjtat fytyra politike, me të njëjtat slogane dhe me të njëjtat fjalime zhurmuese të liderëve partiakë që nuk i dëgjon askush!
Votuesit kërkojnë garanci dhe afate kohore për realizimin e premtimeve të dhëna
Rutina e tubimeve partiake parazgjedhore është bërë e njëjtë, e mërzitshme dhe e gërditshme, me akuza dhe kundër akuza të liderëve partiak kundër njëri-tjetrit, e shumë pak shpalosje të programeve politike.
Fjalimet e liderëve partiakë stonojnë si gramafona të prishur, pa asnjë fjalë apo fjali bindëse për elektoratin, përveç atyre të pushtetarëve për vazhdimësinë e tyre me rritje astronomike dhe shprehjes së dëshirave të opozitarëve për t’u rikthyer në pushtet.
Vrapimi pas liderëve partiakë e jo pas programeve politike do t’iu kthehet bumerang votuesve të rinj të cilët verbërisht ju besojnë premtimeve të fushatës zgjedhore.
Megjithatë, votuesit e vjetër në moshë do të jenë më të matur dhe më të kujdesshëm në votën e tyre! Shkaku i zhgënjimit dhe mashtrimit nga politikanët, tri herë do të mendojnë para se të përcaktohen për një subjekt politik.
Votuesit janë pjekur dhe vetëdijesuar nga dështimet e politikanëve në mbajtjen e premtimeve, ngas nuk ju mjafton vetëm ajo që dëgjojnë nga goja e politikanëve. Ata kërkojnë diçka më shumë, kërkojnë garanci dhe afate kohore për realizimin e premtimeve të dhëna, e jo si më parë, “u tha u bë”, premtime që nuk i realizuan asnjëherë liderët shtetëror dhe partiakë.
Kush e pengoj këtë klasë politike që 17 vjet nga pavarësimi i vendit që nuk e realizuan skemën e sigurimeve shëndetësore dhe përmirësimin e sistemit shëndetësorë në përgjithësi!
Ngase pikërisht është mungesa e sigurimeve shëndetësore që po i detyron njerëzit ta braktisin vendin edhe 26 vjet pas çlirimit!
Qytetarët nuk besojnë më në gënjeshtrat e politikanëve mashtrues
Kështu pra, qytetarët nuk besojnë më në gënjeshtrat e politikanëve mashtrues! Nuk dëshiroj të hy në premtimet elektorale të secilit subjekt veç e veç, pasi, përafërsisht gati të gjitha premtimet e partive politike janë të njëjta, të kriposura me hipokrizi dhe mashtrim.
Nga ajo që shihet nëpër tubimet e partive politike, po vazhdon repriza e fushatave paraprake zgjedhore, me logjikë provinciale pa logjikë të mirëfilltë shtetërore.
Askush nga kandidatët në garë për deputet nuk përkujdesën për të ardhmen e shtetit, por për të ardhmen e tyre provinciale për kënaqjen e egos personale për t’u ulur në karrigën e deputetit në Parlament për t’i marrë 2 mijë euro të buta në muaj pa e bërë asnjë punë të mirë për shtetin.
Përvoja nga e kaluara e ka dëshmuar, që kemi pasur deputet që nga fillimi i mandatit politik në Kuvend asnjëherë nuk e kanë marrë mundin të diskutojnë apo të marrin ndonjë nismë personale për të mirën e qytetarëve dhe as të votuesve të tyre!
Për më keq se kaq, në legjislaturën e fundit të Kuvendit kemi pasur pasivizim enorm dhe mbi 5 mijë mungesa të paarsyeshme të deputetëve në Kuvend dhe çdo gjë përfundoj pa asnjë masë ndëshkimore ndaj deputetëve që morën paga të majme pa qenë fare prezent në seancat e kuvendit.
