Trajneri i Manchester City, Pep Guardiola, ka theksuar rëndësinë e ndeshjes kundër Club Brugge, që do të zhvillohet të mërkurën në Champions League, duke e cilësuar si një finale për ekipin e tij.
City renditet aktualisht në vendin e njëzet e pestë në formatin e ri të champions League, jashtë zonës së “playoff” dhe tri pikë larg skuadrës belge, e cila renditet e njëzeta. Sipas formatit të ri, tetë skuadrat e para kualifikohen direkt në fazën 1/16, ndërsa ekipet që renditen nga vendi i nëntë deri në vendin e njëzet e katërt duhet të luajnë në “playoff” për të siguruar një vend në fazën tjetër.
City rrezikon të mos kalojë tutje për herë të parë në epokën e Guardiola, por megjithatë, trajneri spanjoll ka shprehur besim tek skuadra e tij: “E vlerësoj shqetësimin tuaj për moskualifikimin, por mendoj se do ta bëjmë”, ka thënë ai. “Duhet të fitojmë ndeshjen, përndryshe nuk do të vazhdojmë në këtë garë. Duam të kalojmë për të pasur një shans tjetër për të luajtur edhe dy ndeshje dhe për t’u kualifikuar për fazën tjetër”.
Guardiola e ka vlerësuar ekipin belg, duke theksuar se nuk pret një ndeshje të lehtë.
“Pres një ndeshje të vështirë. Kur një skuadër është e pamposhtur është sepse është e mirë, nuk ka asnjë sekret këtu. Ata kanë bërë shumë mirë”, ka thënë ai. “Do të dëshironim të shënonim shumë gola në njëzet minutat e para, por nuk mendoj se kjo do të ndodhë”.
