Paneli Zgjedhor për Ankesa dhe Parashtresa ka shqiptuar sërish gjobë ndaj Koalicionit për Familje për shkelje të Kodit të Mirësjelljes. Gjoba e shqiptuar në seancën e mbajtur dje është 7.000 euro.
Ky vendim ka ardhur pas ankesave të organizatave jo-qeveritare CEL Kosova dhe Dylberizm për nxitje të urrejtjes nga ky koalicion ndaj personave LGBTI+.
Kjo është gjoba e tretë e shqiptuar ndaj këtij subjekti politik për për gjuhë të urrejtjes kundër komunitetit LGBT+.
“PZAP-ja e ka shqiptuar sot gjobën e tretë ndaj Eman Rrahmanit, Laureta Rexha, Asdren Bytyqit, Jeton Haxhimustafa, Ferid Aganit, Fatmir Smajlit dhe Visar Korenica në vlerë prej 7.000 eurosh. Të trija gjobat vijnë si pasojë e ankesave të organizatave jo-qeveritare CEL Kosova dhe Dylberizm për nxitje të urrejtjes nga ky koalicion ndaj personave LGBTI+. Paraprakisht, Paneli shqiptoi gjobë me vlerë 5.000 euro më 25 janar, ndërsa më 22 janar sanksionoi Koalicionin e udhëhequr nga Eman Rrahmani me 4.500 euro”, thuhet në komunikatën e organizatës Dylberizm.
Në vendimin e PZAP-së thuhet se “Paneli gjeti se gjuha e përdorur nga subjektit politik Koalicioni për Familjen, përkatësisht, nga kandidatët për deputet të këtij subjekti, ndaj LGBTI+ në rrjetin social Facebook, është në kundërshtim me Kodin e Mirësjelljes për Subjektet Politike, Mbështetësit e tyre dhe Kandidatët, përkatësisht, me dispozitat e nenit 34 paragrafi 1, pika 1.11, të L.ZP-së, ku janë të përcaktuara veprimet e ndaluara të subjekteve politike. Në këtë rast është marrë për baze konteksti dhe qëllimi për të cilin është përdorur gjuha ndaj një komuniteti, faktin qe deklaratat janë publikuar ne rrjetin social Facebook, prandaj sipas Panelit, përdorimi i gjuhës së tillë ka për qëllim ofendimin, denigrimin dhe njëherit shihen si shprehje me ngjyrime përçmuese ose nënvlerësuese.”
Ndërkohë Asdren Bytyqi nga Koalicionit për Familje, ka thënë për RTKlive se gjobat e shqiptuara PZAP ndaj këtij koalicioni, janë përpjekje për të kufizuar pluralizmin politik dhe lirinë e shprehjes.
“PZAP na ka shqiptuar një dënim të tretë lidhur me deklarimet e liderëve të Koalicionit për Familje sa i përket premtimeve politike mbi martesën mes gjinive të njëjta. Konsiderojmë se dënimet e Koalicionit për Familje për shkak të një premtimi që na lejon ligji dhe që është premtim qendror i fushatës politike të koalicionit tonë, përkatësisht mosmiratimin e ligjit që parasheh martesën mes gjinisë së njëjtë, është e drejtë e jona politike, kushtetuese dhe ligjore” deklaroi Bytyqi.
Ai shtoi se gjobat e shqiptuara përfaqësojnë “cenim të plotë të pluralizmit politik, lirisë së shprehjes dhe minim të zgjedhjeve,” duke e quajtur këtë një përpjekje për të imponuar një “diktaturë politike vetëm ndaj diskursit të Koalicionit për Familje.”
“Ne kemi parashtruar ankesë në Gjykatën Supreme për dy vendimet e para, por vendimin e tretë nuk e kemi pranuar ende,” përfundoi Bytyqi.
