Policia e Kosovës ka bërë të ditur se gjatë 24 orëve të fundit janë raportuar katër raste të dhunës në familje. Rastet kanë ndodhur në Prishtinë, Fushë Kosovë dhe Gjakovë, teksa lidhur me to janë arrestuar tre persona.
Në rastin e parë në Prishtinë është arrestuar një person pasi dyshohet se kanosi të dashurën.
Rasti është iniciuar si “Kanosje” dhe “Dhunë në familje”.
“Prishtinë 25.01.2025 – 21:00. Më 27.01.2025 është arrestuar i dyshuari mashkull kosovar për shkak se i njëjti dyshohet se e ka kanosur të dashurën, viktimën femër kosovare. I dyshuari me vendim të prokurorit është dërguar në mbajtje”, thuhet në raportin 24 orësh të policisë.
Kurse, në rastin e dytë në Prishtinë, raportohet se një shtetas i Turqisë ka raportuar se bashkëshortja e tij ia ka pamundësuar qasjen në shtëpi.
“Ankuesi mashkull shtetas i Turqisë ka raportuar se e dyshuara (bashkëshortja) femër shtetase e Turqisë, ia ka pamundësuar qasjen në shtëpi. Lidhur me rastin është njoftuar prokurori”, njofton policia.
Në Fushë-Kosovë është arrestuar një person nën dyshimin se ka sulmuar nënën e tij. Ndërkaq në Gjakovë raportohet se një i dyshuar largoi nga shtëpia fëmijët e ankueses, derisa ajo ka qenë në punë. I dyshuari është arrestuar.
Lidhur me rastin i dyshuari është arrestuar dhe pas intervistimit me vendim të prokurorit është liruar në procedurë të rregullt.
