Turqia po kërkon një kontratë mbrojtjeje me vlerë 6 miliardë dollarë (5.72 miliardë euro) me Arabinë Saudite, e cila mund të përfshijë shitjen e tankeve, anijeve luftarake dhe raketave, si dhe një partneritet në programin e avionëve luftarakë të Turqisë, thanë burime të njohura me negociatat për Bloomberg .
Presidenti turk Rexhep Tajip Erdogan duhet të vizitojë Arabinë Saudite në mars për të finalizuar marrëveshjen, sipas të njëjtave burime. Marrëveshja shihet si një hap strategjik në përpjekjet e Turqisë për të zgjeruar industrinë e saj të mbrojtjes dhe për të forcuar marrëdhëniet me një nga importuesit më të mëdhenj të armëve në botë.
Partneritet i mundshëm në programin e avionëve luftarakë KAAN
Arabia Saudite thuhet se është e interesuar të marrë pjesë në programin e avionëve luftarakë të gjeneratës së 5-të të Turqisë KAAN, i cili është krijuar për të ofruar aftësi të avancuara luftarake. Programi kreu me sukses fluturimin e tij të parë testues vitin e kaluar, por do të duhen edhe disa vite të tjera për të arritur gatishmërinë e plotë operacionale.
Partneriteti i propozuar mund të kontribuojë në objektivat e Vizionit 2030 të Arabisë Saudite, të cilat përfshijnë lokalizimin e prodhimit ushtarak.
Bashkëpunimi i mëparshëm i mbrojtjes midis Turqisë dhe Arabisë Saudite
Në vitin 2023, Arabia Saudite nënshkroi një kontratë 3 miliardë dollarësh me Baykar, prodhuesi kryesor i dronëve në Turqi, për të blerë dronët Akinci. Ky bashkëpunim përfshin transferimin e teknologjisë, prodhimin e përbashkët dhe fabrikimin lokal të 70% të komponentëve të dronit Akinci brenda Arabisë Saudite, sipas Saudi Military Industries (SAMI).
Kontratat e tjera të mbrojtjes në negociata
Përveç dronëve, Turqia dëshiron t’i shesë Arabisë Saudite tankun kryesor të betejës Altay dhe sistemet e mbrojtjes ajrore. Zyrtarët theksojnë se këto sisteme do të përmirësonin aftësitë mbrojtëse të Arabisë Saudite duke mbështetur eksportet në rritje të armëve të Turqisë.
Marrëveshja përfshin gjithashtu bisedime për bashkëpunim të mëtejshëm midis dy vendeve në zhvillimin e teknologjive të larta dhe prodhimit të mbrojtjes, gjë që përshtatet në planet e Arabisë Saudite për të diversifikuar ekonominë e saj dhe për të rritur kapacitetin e prodhimit vendas.
Marrëdhëniet midis Ankarasë dhe Riadit janë përmirësuar ndjeshëm vitet e fundit, pas tensioneve të shkaktuara nga vrasja e gazetarit Jamal Khashoggi në vitin 2018.
