Shkruan: Gurakuç KUÇI- Instituti për Studime të Luftës Hibride “Octopus”
Nga 1 shkurti, Serbia pritet të fillojë një skemë financimi të serbëve në Kosovë, të maskuar si ndihma sociale, por që në realitet synon blerjen e votës për Listën Srpska. Kjo strategji, e mirëmenduar nga Beogradi që prej shtatorit të vitit të kaluar, filloi të zbatohej gradualisht në nëntor, vetëm disa ditë para sulmit terrorist mbi Ibër Lepenc. Tani, ajo do të hyjë në fazën e saj aktive.
Ky veprim përbën një shembull të qartë të luftës hibride që Serbia po përdor për të ndërhyrë në proceset zgjedhore në Kosovë. Modeli nuk është i ri, ai frymëzohet nga Rusia, e cila ka ndërhyrë në mënyrë të ngjashme në zgjedhjet e vendeve si Ukraina, Gjeorgjia dhe më tej. Për më tepër, ndërhyrjet e përbashkëta mes Rusisë dhe Serbisë janë regjistruar në Maqedoninë e Veriut dhe Malin e Zi. Në Kosovë, një përpjekje e tillë u tentua edhe në vitin 2021, por që ndërhyrja institucionale e bëri të pasuksesshëm.
Kjo taktikë e ndërhyrjes në zgjedhje, e kombinuar me financime të fshehta dhe dezinformim, është një përpjekje për të kontrolluar gjeopolitikën përmes manipulimit të proceseve demokratike. Në punimet e mia e kam quajtur këtë fenomen “Gjeopolitika e Zgjedhjeve”, dhe kam analizuar rolin e Rusisë dhe Serbisë në këto procese.
