Të paktën 15 persona u vranë mbrëmë në Prayagraj, në Indinë veriore, gjatë një rrëmuje në pelegrinazhin masiv Hindu Kumbh Mela, raporton AFP.
Shumë pelegrinë u plagosën në aksident, disa rëndë dhe u shtruan në spital, tha për AFP një nga mjekët në spitalin Swaroop Rani Nehru në Prayagraj, ku viktimat u evakuuan.
Autoritetet lokale dhe forcat e sigurisë nuk kanë dhënë ende ndonjë raport mbi rrëmujën.
Në vendngjarje, një reporter i AFP pa viktima të shumta duke u evakuuar nga shpëtimtarët dhe adhuruesit me batanije.
“Papritur turma filloi të shtynte dhe shumë njerëz u shtypën”
“Ne po shkonim drejt Sangam (bashkimi i lumenjve të shenjtë Ganges dhe Yamuna ku mbahen banjot rituale) dhe rrugët u bllokuan. Papritur turma filloi të shtynte dhe shumë njerëz u shtypën,” i tha AFP 42-vjeçari Malti Pandey. .
Kumbh Mela konsiderohet tubimi më i madh fetar në botë, ku miliona besimtarë hindu nga e gjithë India marrin pjesë për t’u larë në bashkimin e lumenjve të shenjtë Ganges dhe Yamuna.
Banjat rituale mbahen çdo 12 vjet dhe sipas traditës hindu, ato lejojnë njeriun të lajë mëkatet dhe të çlirohet nga cikli i rilindjeve dhe rimishërimeve.
Autoritetet njoftuan më shumë se 400 milionë pjesëmarrës
Këtë vit, festivali masiv zhvillohet nga 13 janari deri më 26 shkurt dhe autoritetet kanë njoftuar më shumë se 400 milionë pjesëmarrës, duke e bërë atë tubimin më të madh deri më tani.
Tubimet fetare janë rregullisht skena e aksidenteve fatale në Indi për shkak të menaxhimit të dobët të turmës dhe mangësive të sigurisë.
Korrikun e kaluar, më shumë se 120 njerëz u vranë në shtetin Uttar Pradesh gjatë një rrëmuje në një tubim ku morën pjesë më shumë se 250,000 besimtarë që kishin ardhur për të dëgjuar një predikues të njohur hindu.
