Kryetari i Lidhjes Demokratike të Kosovës, Lumir Abdixhiku, ka organizuar sot një Akademi Përkujtimore në nderim të veprimtarit dhe atdhetarit të shquar, ish-nënkryetarit të LDK-së dhe kryetarit të Istogut, Fadil Ferati, në 15-vjetorin e ndarjes së tij nga jeta.
Në këtë ceremoni, përveç Abdixhikut, morën pjesë edhe familja e Feratit, bashkëveprimtarë dhe miq të tij, të cilët kujtuan figurën e një prej personaliteteve më të rëndësishme të historisë moderne të Istogut dhe LDK-së.
“Fadili nuk ishte thjesht një kryetar komune apo një politikan, por një shembull i përkushtimit të palëkundur ndaj qytetarëve dhe shtetit të Kosovës. Ai ishte një njeri i urtë dhe vizionar, ndër shtyllat më të forta të LDK-së, besnik ndaj vizionit të Presidentit Historik, Dr. Ibrahim Rugova,” u shpreh Abdixhiku.
Në fjalën e tij, ai theksoi kontributin e jashtëzakonshëm të Feratit në ndërtimin e institucioneve demokratike të Kosovës dhe fazat kyçe të shtetformimit. “Puna dhe angazhimi i tij mbeten një udhërrëfyes për të gjithë ata që besojnë në politikën si shërbim ndaj qytetarit,” tha ai.
Pas Akademisë Përkujtimore, Abdixhiku, bashkë me familjen dhe bashkëpunëtorët e Feratit, zhvilloi homazhe te varri i tij, duke shprehur respektin dhe mirënjohjen për jetën dhe veprën e këtij burri të madh.
“Lavdi jetës dhe veprës së Fadil Feratit,” përfundoi Abdixhiku. /Kosovatimes/
