Shkruan: Shenoll MUHARrEMI
Ekonomia, por edhe politika, funksionojnë me cikle. Kanë periodicitetet e tyre specifike. Jo të gjithë i shohin dhe i konsiderojnë këto cikle kur bëjnë strategjitë dhe ‘hesapet’ e tyre.
Kur ekonomia është mirë, fillojnë investimet nga investitorët kryesor në Wall Street. Në atë kohë, fillojnë të rriten fitimet. Pastaj kyçen investitorët e mesëm… e në fund, ata amatorët apo njerëzit nga masat. “E bleva TESLA”… “Investova në Bitcoin se ish hyp shumë!”
Të parët janë investitorë, ata e kuptojnë ciklin dhe që jo gjithçka shkon lart. Këta shesin pas një kohe kur cikli rekomandon dhe fitojnë, vlera fillon të ulet nga ai moment. Nga të dytët (investitorët e mesëm), shumica fitojnë, por disa më lakmitarë humbin sepse nuk e kuptuan ciklin dhe modifikuan strategjinë me kohë. Të fundit, njerëzit dhe investitorët amatorë, humbin në shumicën absolute të rasteve. Këta nuk e kuptojnë ciklin dhe rrethanat dhe janë tepër lakmitarë.
Albin Kurti dhe LVV, deri në zgjedhjet e vitit 2021, ishin investitorë. Ata kishin pasur të gjithë durimin dhe po luftonin për kauza. Parimet po i ruanin me shumë xhelozi. Pas një investimi me kohë (herët), pritjeje të gjatë dhe ruajtjeje të parimeve… fituan në mënyrë dramatike më 2021.
Kjo eksperiencë i bëri të mendojnë se fitimi nuk ka fund. Se resurset (votat, përkrahja) janë të pashtershme. Ata harruan CIKLIN. Sa ishin në opozitë, cikli funksionoi në dobi të tyre. Por nuk e kuptuan që, kur futen në qeveri dhe morën gjithë atë pushtet, ky cikël po punon për tjetrët (opozitën).
Në fushatën elektorale të zgjedhjeve të 9 shkurtit 2025, LVV dhe Albin Kurti strategjinë e tyre e ndërtuan sikur investitorët amatorë. Sikur ata që mendojnë se tregjet dhe ekonomia vetëm rriten. Sikur që ekziston vetëm fitimi.
Nuk përgatitën program për qeverisje, nuk morën parasysh konkurrencën, sidomos nuk e kuptuan ciklin. Menduan se do të rriteshin përgjithmonë. Kështu, sikurse 438k vota nuk mjaftonin, ata po kërkonin tashmë 500k vota. Ky është një indikator i lakmisë së skajshme, që zakonisht përthehet në arrogancë dhe humbje.
LVV dhe Albin Kurti, nga investitorë të matur, u transformuan në kumarxhinj. Ata kishin fituar mirë si investitorë: 340% rritje! kishin pasur për disa vite. Por kjo nuk mjaftoi. Lakmia për më shumë ndikoi që strategjia e tyre të kërkonte edhe më shumë, ENDE… Kjo, sipas të gjitha gjasave dhe rregullit të hekurt të ciklit, do të përkthehet në strategji të gabuar dhe humbje të vlerës.
