Nënkryetarja e LDK-së, Hykmete Bajrami, ka reaguar ashpër ndaj deklaratës së kryeministrit në largim, Albin Kurti, i cili ironizoi me situatën ekonomike dhe sociale në Kosovë, duke thënë se prindërit duan t’ia sjellin fëmijët për t’ua rritur.
Bajrami e akuzoi Kurtin për tallje me qytetarët e Kosovës, duke theksuar se ai vetë ka familjen e tij jashtë vendit, përkatësisht në Oslo të Norvegjisë, ku vajza e tij po rritet dhe arsimimi i saj po zhvillohet larg sfidave të përditshme në Kosovë.
Ajo i bëri thirrje Kurtit që ta sjellë familjen e tij në Kosovë dhe të përballet me realitetin e arsimit, shëndetësisë, ekonomisë dhe kulturës, ashtu siç e përjetojnë qytetarët çdo ditë.
“Le të vijë e ta përjetojë arsimin, shëndetësinë dhe ekonominë siç i përjetojnë prindërit dhe fëmijët në Kosovë, e jo të tallet me ta,” u shpreh Bajrami.
Ky reagim vjen në një kohë të tensionuar politike, ku kritikat ndaj qeverisjes së Kurtit po shtohen, veçanërisht në aspektin ekonomik dhe social. /Kosovatimes/
