Bashkësia Hebreje-Bet Israel Kosova organizoi Ditën Ndërkombëtare Përkujtimore të Holokaustit.
Në këtë ditë përkujtimi, në të cilën morën pjesë edhe diplomatë të jashtëm të akredituar në Kosovë, kreu i Prishtinës Përparim Rama u ndal në ndihmën e shqiptarëve të cilët edhe rrezikuan jetën duke u ndalë në ndihmë komunitetit hebre të kryeqendrës gjatë luftës së dytë Botërore.
Ai tha se këtë ditë e kujtojnë BESËN e shqiptarëve – mbi të cilën i strehuan, i mbrojtën dhe i shpëtuan komunitetin hebre duke vënë në rrezik edhe jetën e tyre.
“Ky akt guximi u përjetësua në “Murit e Nderit” në Prishtinë, një dëshmi e shpirtit të solidaritetit”, tha Rama.
Ai rikujtoi se para Luftës së Dytë Botërore, Prishtina ishte shtëpia e një komuniteti hebre të integruar dhe kontribuues në jetën shoqërore e kulturore, por që errësira e një ideologjie çnjerëzore kërkoi ta fshijë atë nga historia.
“Prishtina do të mbetet qytet i diversitetit, i harmonisë dhe i të drejtave për të gjithë. Sot, më shumë se kurrë, le të angazhohemi që historia të mos përsëritet dhe që e ardhmja të ndërtohet mbi paqen dhe bashkëjetesën”, tha Rama.
Një fjalim hyrës të këtij organizimi e mbajti Kryetari i Bashkësisë Hebreje Bet Izrael Kosova z. Hysen Hyseni. dhe Shkëlqesia e Saj Ambasadorja e Shtetit te Izraelit në Kosovë znj. Tamar Ziv, e ngarkuara me punë në Ambasadën e Shteteve të Bashkuara të Amerikës znj. Anu Prattipati.
Në fund u shfaq dokumentari dedikuar Stela Esther Levi e mbijetuara e Holokaustit gjatë Luftës së Dytë Botërore.
