Kandidati i PDK-së për Kryeministër, Bedri Hamza, gjatë fushatës në Gjakovë vizitoi prodhues vendorë dhe premtoi masa lehtësuese fiskale për ta, duke përfshirë uljen e tatimeve dhe përjashtime për investime të mëdha.
Partia Demokratike e Kosovës, sot ka bërë fushatë nëpër Gjakovë. Kandidati për kryeministër Bedri Hamza, gjatë vizitës së tij, ka takuar prodhues vendorë dhe theksoi rëndësinë e mbështetjes për ta.
“Kudo që po shkoj, po vizitoj lloj-lloj prodhuesish të mirë dhe të suksesshëm. Është krenari që kemi njerëz të tillë punëtorë. Politikat tona fiskale duhet të ndryshohen, TVSh-ja duhet të paguhet në brendi. Për kompanitë që investojnë mbi 500 mijë euro, punësojnë mbi 50 punëtorë do të ketë pushime tatimore. Kanë me u liru prej pagesës së tatimit në fitim për korporata, varësisht nga investimi dhe numri i të punësuarve. Deri 400 euro, të gjithë punëtorët që marrin paga, tatimin do ta kenë 0%,” ka thënë Hamza.
