Koalicioni AAK – NISMA – KONSERVATORËT – FORUMI INTELEKTUAL E30 – IDEAL ka mbajtur tubimin zgjedhor në komunën e Vitisë. Kandidati për kryeministër, Ramush Haradinaj, shpalosi programin e tyre ku në fokus ka sigurinë dhe anëtarësimin direkt në NATO.
“Pse të na votoni ne dhe si bëhet Kosova fituese? E para është siguria dhe ekonomia. E vetmja mënyrë që të kemi siguri të plotë është përmes anëtarësimit në NATO. E vetmja kohë për t’u anëtarësuar në NATO është ajo përmes planit aksional direkt në NATO”, theksoi ai.
Haradinaj shtoi se me qeverisjen e tij do të ketë ulje të çmimit të energjisë dhe rritje të pagave dhe pensioneve.
“Po ashtu, ju garantojmë edhe ulje të çmimit të energjisë. A kemi dëshmi? Po, për NATO unë kam qenë në ushtri, kurse në qeverinë time, nuk ka pasur rritje të çmimit të energjisë. Ne do ta zhvillojmë vendin, me ne nuk do të ketë pensione nën 500 euro”, shtoi ai.
Partneri i tij i koalicionit, kryetari i Nismës, Fatmir Limaj, tha se vizioni i koalicionit është për një Kosovë fituese.
“Qytetarë të Anamoravës, ju keni miliona arsye për t’i thënë JO atyre që ju kanë qeverisur dhe ofenduar. Vajza e burra, rreshtohuni ndaj veprave. Koalicioni ynë, jo rastësisht, është për Kosovën fituese, kjo tregon se kudo që ne jemi angazhuar, Kosova ka qenë fituese. Vizioni ynë është me Kosovën të fitojë dhe jo një individ apo parti”, tha ai.
Kurse kryetari i Degës së AAK-së në Viti, njëherësh kandidat për deputet, Labinot Bislimi, tha se rruga e Kosovës është drejt Evropës dhe NATO-s.
