Kërkimet e fundit shkencore tregojnë se popullsia e minjve në qytete po rritet me shpejtësi për shkak të ngrohjes globale. Në një analizë të 16 qyteteve në mbarë botën, rritjet më të mëdha të numrit të brejtësve u regjistruan në Uashington, San Francisko, Toronto, Nju Jork dhe Amsterdam.
Sipas hulumtimit të botuar në revistën Science Advances , njëmbëdhjetë prej këtyre qyteteve kanë përjetuar “prirje të rëndësishme në rritjen e popullsisë së minjve” dhe këto tendenca ka të ngjarë të vazhdojnë në vitet e ardhshme. Shkencëtarët që studiuan të dhënat mbi infektimet dhe shikimet e minjve raportuan se numri i brejtësve është rritur me 390% në Uashington, DC, 300% në San Francisko, 186% në Toronto dhe 162% në New York City gjatë dekadës së fundit.
Qytetet e mëdha si Londra dhe Parisi nuk u përfshinë në studim për shkak të mungesës së të dhënave, por studiuesit besojnë se rezultatet mund të aplikohen në shumë metropole të tjera në mbarë botën. “Nuk ka asnjë arsye për të menduar se situata do të ishte ndryshe diku tjetër,” tha studiuesi kryesor Jonathan Richardson nga Universiteti i Richmond në Virxhinia.
Toronto ndër qytetet më të goditura
Në Toronto, një nga qytetet më të prekura nga ky fenomen, banorët po dëshmojnë një rritje dramatike të numrit të brejtësve. “Kur ecni nëpër rrugët e Torontos, ka një zonë poshtë jush, thellë në sistemin e kanalizimeve, që është plot me minj,” tha Alice Sinia, entomologe kryesore në Orkin.
Numri i saktë i minjve mbetet i panjohur sepse nuk është studiuar kurrë në mënyrë sistematike, shtoi Sinia. Dy këshilltarë të qytetit të Torontos, Alejandra Bravo dhe Amber Morley, kërkuan zhvillimin e një plani zyrtar menaxhimi vitin e kaluar për të adresuar problemin. “Është një kërcënim serioz për cilësinë e jetës kur njerëzit ndeshen me minjtë në shtëpitë, zyrat apo vendet e tyre të punës”, tha Bravo.
Qytete të tjera që kanë parë një rritje të numrit të minjve përfshijnë Oakland, Buffalo, Chicago, Boston, Kansas City dhe Cincinnati. Studimi u fokusua në qytetet amerikane, si dhe në Amsterdam, Toronto dhe Tokio, sepse këto qytete regjistrojnë të dhëna të ngjashme për shikimin e minjve.
Hulumtimi nuk përcaktoi numrin e përgjithshëm të popullsisë së minjve, por vetëm rritjen relative të ankesave me kalimin e kohës. Autorët e studimit theksojnë se rritja e temperaturës shoqërohet me një rritje të numrit të minjve. Minjtë e kanë të vështirë të mbijetojnë dimrin për shkak të madhësisë së tyre, por në temperatura më të larta ata mund të riprodhohen për pjesën më të madhe të vitit dhe të kërkojnë ushqim për më gjatë.
Në Toronto në veçanti, dimrat e ftohtë kanë shërbyer prej kohësh si “kontroll natyror i dëmtuesve”, duke eliminuar një numër të konsiderueshëm brejtësish. Megjithatë, temperaturat më të buta kanë nxitur një shpërthim në popullsinë e minjve të qytetit.
