Shtetet e Bashkuara duan që Ukraina të mbajë zgjedhje presidenciale dhe parlamentare, tha i dërguari special i Presidentit Donald Trump.
Keith Kellogg, i dërguari special i Trump për Ukrainën dhe Rusinë, shtoi se zgjedhjet mund të mbahen deri në fund të vitit, veçanërisht nëse arrihet një armëpushim me Rusinë. “Shumica e kombeve demokratike kanë zgjedhje në kohë lufte. Mendoj se është e rëndësishme që zgjedhjet të mbahen,” tha Kellogg për agjencinë e lajmeve Reuters.
“Unë mendoj se është mirë për demokracinë. Kjo është bukuria e një demokracie të fortë, të kesh më shumë se një person që kandidon,” shtoi ai.
Zelensky duhej të përfundonte mandatin e tij pesëvjeçar vitin e kaluar.
Para se të zgjidhej, Trump pretendoi se mund t’i jepte fund luftës së Rusisë në Ukrainë në vetëm një ditë. Si Trump ashtu edhe Kellogg theksojnë se ata po punojnë në një plan për të arritur një marrëveshje që do t’i jepte fund luftës që Rusia filloi me një pushtim të plotë në shkurt 2022.
Kellogg dhe zyrtarë të tjerë të Shtëpisë së Bardhë kanë diskutuar inkurajimin e Ukrainës për të rënë dakord për zgjedhjet si pjesë e çdo armëpushimi fillestar me Rusinë, konfirmuan për Reuters dy persona të njohur me diskutimet. Akuzat për ndërhyrje ruse janë shfaqur në vende të tjera të Evropës Lindore që kanë mbajtur zgjedhje në muajt dhe vitet e fundit.
Presidenti ukrainas Volodymyr Zelensky tha më parë se Ukraina mund të mbajë zgjedhje këtë vit nëse luftimet ndalojnë dhe nëse ka garanci të forta sigurie që e pengojnë Rusinë nga rinovimi i armiqësive. Mandati pesëvjeçar i Zelenskit duhej të përfundonte në vitin 2024, por zgjedhjet presidenciale dhe parlamentare nuk u mbajtën për shkak të gjendjes së jashtëzakonshme që Ukraina vendosi në shkurt 2022.
Sipas dy ish-zyrtarëve të lartë amerikanë, Uashingtoni u ka kërkuar tashmë ukrainasve në 2023 dhe 2024 se kur planifikojnë të mbajnë zgjedhje. Zyrtarët në Kiev u thanë njerëzve të Bidenit se mbajtja e zgjedhjeve në një kohë kaq të paqëndrueshme mund të dobësojë Ukrainën.
Luftimet e ashpra vazhdojnë në vijat e frontit
Mes pyetjeve të vazhdueshme rreth një përfundimi të mundshëm të konfliktit, vetë luftimet vazhdojnë. Ushtria ukrainase njoftoi sot se forcat ruse kishin goditur një objekt në pjesën e pushtuar të rajonit Kursk, ku njerëzit po përgatiteshin për evakuim.
Dronët dhe raketat ruse vranë 12 persona dhe dëmtuan dhjetëra ndërtesa banimi, si dhe infrastrukturë energjetike në sulmet e sotme në Ukrainë.
