Bedri Hamza, kandidati i PDK-së për kryeministër, gjatë një tubimi elektoral në Lipjan tha se programi i PDK-së garanton zhvillim të qëndrueshëm ekonomik dhe përmirësim të kushteve të jetesës për qytetarët.
Partia Demokratike e Kosovës mbajti takim elektoral me qytetarët në Lipjan, ku premtoi mbështetje për bizneset dhe ngritje të standardit jetësor.
“Garojmë me një program të qartë, zhvillim të qëndrueshëm ekonomik, krijim të kushteve për jetesë, ku njerëzit do të kenë jetë të dinjitetshme. Do t’i përkrahim bizneset. Lipjani ka shumë biznese, ne do t’i përkrahim në çdo aspekt – në politika të favorshme fiskale, tatimore dhe lehtësim të qasjes në financa”, deklaroi Hazma.
Ai tha se veteranëve do t’u njihet e drejta që të punojnë, pa iu ndalur pensioni. Ndërsa premtoi investime në shëndetësi dhe rritje të buxhetit për barnat esenciale.
“150 milionë euro për barnat esenciale, për sëmundjet kronike dhe për sëmundjet e rënda”, potencoi Bedri Hamza.
Në Lipjan u prezantuan edhe kandidatët për deputetë nga kjo komunë.
