Më shumë se 20,000 punonjës federalë kanë informuar qeverinë amerikane se janë të gatshëm të japin dorëheqjen sipas një “programi të dorëheqjes së shtyrë”, konfirmoi sot një burim për Reuters.
Dy milionë punonjës civilë federalë me kohë të plotë morën një ofertë nga Shtëpia e Bardhë javën e kaluar për të dhënë dorëheqjen dhe për të marrë paga dhe përfitime deri më 30 shtator, pasi administrata Trump kërkon të reduktojë stafin e qeverisë amerikane.
Data 6 shkurt është afati i fundit për vendimin.
Shtëpia e Bardhë njoftoi të dielën se po përjashton punonjësit e sigurisë publike, përfshirë kontrollorët e trafikut ajror, nga “programi i dorëheqjes së shtyrë”. Disa demokratë argumentojnë se oferta nuk është e ligjshme. Zyra e Menaxhimit të Personelit të Shtëpisë së Bardhë mbrojti ligjshmërinë e programit në një memo drejtuar agjencive të martën.
“Programi i dorëheqjes së shtyrë” do t’i lejojë punonjësit federalë të qëndrojnë në listën e pagave deri më 30 shtator, por nuk duhet të punojnë, sipas një emaili dërguar punonjësve federalë dhe të parë nga Reuters. Pagesat federale të ndarjes në përgjithësi kufizohen në 25,000 dollarë. Punonjësve iu dha afat deri më 6 shkurt për të marrë një vendim.
Në email thuhet gjithashtu se administrata pret një “fuqi punëtore më të thjeshtë dhe më fleksibël”. Megjithëse ushtria dhe disa agjenci do të rrisin numrin e stafit të tyre, shumica e agjencive ka të ngjarë të zvogëlohen përmes ristrukturimit dhe pushimeve nga puna.
