Policia indoneziane ka arrestuar 56 burra në një “festë seksi homoseksual” në kryeqytetin Xhakarta dhe tre prej tyre mund të përballen me deri në 15 vjet burg për akuzat për shkelje të ligjeve për pornografinë, tha një zëdhënës i policisë.
Sipas Reuters , burrat u arrestuan të shtunën në një hotel në Xhakartën e Jugut pas një “feste të të njëjtit seks”, u tha gazetarëve dje vonë zëdhënësi i policisë Ade Ary Syam Indradi. Tre të arrestuarit janë cilësuar si të dyshuar për organizimin e ngjarjes.
Homoseksualiteti nuk është i paligjshëm në shumicën e Indonezisë, duke përfshirë kryeqytetin, por përgjithësisht konsiderohet një temë tabu në vendin me shumicë myslimane. “Ngjarja bazohej thjesht në kënaqësinë që ata donin të arrinin,” tha Indradi, duke shtuar se autoritetet gjetën prezervativë dhe ilaçe për HIV në festë.
15 vjet burg
Tre të dyshuarit u akuzuan për lehtësimin e shërbimeve “pornografike”, që parashikon një dënim maksimal prej 15 vjetësh burgim, tha Indradi.
Aktivistët kanë paralajmëruar se ligjet kundër pornografisë shpesh abuzohen. Gjatë bastisjeve të policisë në vitin 2017, qindra njerëz u arrestuan në klube, hotele dhe spa, të cilat Amnesty International i quajti “dëshmi të një mjedisi gjithnjë e më armiqësor” për komunitetin homoseksual.
Një studim i Qendrës Kërkimore Pew 2020 zbuloi se 80% e indonezianëve besojnë se homoseksualiteti “nuk duhet të pranohet në shoqëri”.
