Trupi gjykues i Dhomave të Specializuara në Hagë ka shpallur vendimin për dënim me burg ndaj Haxhi Shalës, Sabit Januzit dhe Ismet Bahtijarin për frikësim të dëshmitarëve dhe për pengim të drejtësisë.
Sipas kryetares së trupit gjykues, Mappie Veldt- Foglia, Haxhi Shala dënohet me tri vite burg, ndërsa Januzi dhe Bahtijari me nga dy vite burgim. Atyre do t’u llogaritet edhe koha e kaluar në paraburugim.
Ndërkaq, ata janë dënuar edhe me 500 euro gjobë ndaj viktimës 1, në këtë rast, prej të cilave 400 euro do t’i paguaj Shala, 100 euro Januzi, ndërsa Bahtijari nuk do të paguaj.
Në njoftimin për media thuhet se Prokurorja e Specializuar Kimberly West e ka përshëndetur pranimin e fajësisë nga tre të akuzuarit në rastin Sabit Januzi dhe të tjerët si “historik” dhe “me rëndësi kritike për mbrojtjen e integritetit të procedurave” në Dhomat e Specializuara të Kosovës.
Aty thuhet se, si Haxhi Shala, ashtu edhe Sabit Januzi dhe Ismet Bahtijari, miratuan në marrëveshje të veçanta për pranimin e fajësisë me Zyrën e Prokurorit të Specializuar faktin se ishin përfshirë në frikësim të dëshmitarit dhe pengim.
Kundër të akuzuarve ishin ngritur padi për frikësim gjatë procedurave penale dhe pengim të personave zyrtarë në kryerjen e detyrave zyrtare.
“Marrëveshjet e pranimit të fajësisë janë precedent historik për faktin se ato përfaqësojnë rastin e parë kur të akuzuarit në DHSK pranojnë vullnetarisht fajin e tyre,” tha Prokurorja e Specializuar.
“Ky zhvillim është me rëndësi kritike për mbrojtjen e integritetit të procedurave në DHSK, si dhe një hap përpara për administrimin e drejtësisë në Kosovë. Zyra ime është e përkushtuar për vendosjen e papenguar të drejtësisë, bazuar në faktet dhe ligjin”, ka thënë ajo.
“ZPS-ja ka hetuar krimet kundër administrimit të drejtësisë me qëllim që të garantojë që dëshmitarët të mund të dëshmojnë në gjyq lidhur me krimet që kanë parë apo pësuar pa u druajtur nga frikësimi apo hakmarrja. Këto hetime kanë qenë faktor themelor në përparimin e të gjitha ndjekjeve të tjera penale dhe do të vazhdojnë të jenë pjesë qendrore e punës së ZPS-së.”
