Nga sulmi i djeshëm në qendrën për edukim në Orebro të Suedisë janë vrarë 11 persona përfshirë edhe sulmuesin. Policia ka thënë se ai ka vepruar si i vetëm ndërsa ministri i Drejtësisë ka thënë se shkollat në mbarë vendin janë të sigurta për të vazhduar procesin mësimor. Qendra për edukim ku është kryer sulmi frekuentohet nga personat që nuk e kanë kryer edukimin fillor apo atë të mesëm.
Policia suedeze ka bërë të ditur se si pasojë e të shtënave në qendrën për edukim në Orebro,në Suedinë Qendrore janë vrarë 11 persona, përfshirë edhe sulmuesin e dyshuar.
Spitali Universitar në Orebro ka thënë se 5 të lënduar nga armë zjarri janë trajtuar në njësinë e emergjencës, ndërsa personi i gjashtë, i lënduar por jo nga armë zjarri, është trajtuar për lëndime të lehta. Spitalet tjera në afërsi pas ngjarjes ishin përgatitur për pritjen e pacientëve eventual duke liruar shtretërit në njësitë e emergjencës dhe të kujdesit intensiv.
Ulf Kristersson, Kryeministri i Suedisë sulmin e djeshëm në Orebro e ka përshkruar si sulmin më të rëndë në histori të Suedisë sa i përket të shtënave në masë.
Policia ka thënë se i dyshuari për sulmin ka vepruar si i vetëm dhe që është në mesin e të vrarëve. Në një deklaratë, policia ka thënë se numri i saktë i të lënduarve nga sulmi i djeshëm ende nuk dihet.
Gunnar Strommer, ministri suedez i Drejtësisë, sa i përket rastit ka thënë të mos ketë parë asnjëherë të shtëna të kësaj shkalle në ndonjë shkollë. Strommer u ka shprehur ngushëllime të prekurve nga kjo tragjedi dhe njëherit i ka siguruar qytetarët se shkollat në mbarë vendin, të mërkurën do të jenë të sigurta për të vazhduar procesin mësimor.
Shkolla Risbergska është një qendër për edukimin e të rriturve ndërsa ndodhet në po të njëjtin kampus me shkolla tjera. Këto qendra kryesisht frekuentohen nga persona që nuk e kanë përfunduar shkollimin fillor apo atë të mesëm.
