Prokuroria Themelore në Prishtinë ka njoftuar se ka nisur hetimet lidhur me raportimet për keqpërdorim të mundshëm nga Ambasadori Martin Berishaj në lidhje me procedurën e transportimit të votave të qytetarëve të Kosovës në diasporë, si pjesë e procesit zgjedhor.
Në komunikatën e “Prokurorisë Themelore të Prishtinës” thuhet se janë duke u shqyrtuar raportimet për të parë nëse ka elemente të veprës penale që lidhen me procesin zgjedhor.
“Prokuroria Themelore në Prishtinë në vazhdën e aktiviteteve për ruajtjen dhe mbarëvajtjen e procesit zgjedhor, pas raportimeve lidhur me keqpërdorimet e mundshme të Ambasadorit M.B. rreth procedurës se transportimit të votimeve të qytetareve të Republikës së Kosovës në diasporë, për cka Prokurori i Shtetit filluar ndërmarrjen e veprimeve të nevojshme hetimore nëse në raportimet në fjalë përmbushen elementet e ndonjë vepre penale që lidhet me procesin e zgjedhjeve, me qëllim të ruajtjes së këtij procesi”, theksohet në komunikatë.
Prokurori i shtetit në bashkëpunim dhe koordinim me të gjitha organet ligjzbatuese do të ndërmarr të gjitha veprimet e nevojshme me qëllim të parandalimit të dëmtimit të procesit zgjedhor
Ndërkohë, Komisioni Qendror i Zgjedhjeve ka thënë se do të vlerësohet nëse tërheqja e pakove me fletëvotime është bërë në përputhje me akte nënligjore dhe se një vendim meritor do të merret në lidhje me këtë çështje.
“Lidhur me lajmin që po qarkullon për tërheqjen e pakove me fletëvotime nga kutia postare e KQZ-së në Zagreb (Kroaci), sqarojmë se do të vlerësohet nëse tërheqja e pakove me fletëvotime nga kjo kuti postare është bërë sipas akteve nënligjore dhe KQZ do të marrë vendim meritor”, ka thënë Valmir Elezi, zëdhënës i KQZ-së.
