Shkruan: Gurakuç Kuçi- Instituti për Studime të Luftës Hibride “Octopus”
A është e drejtë e garantuar zgjedhja e lirë, apo Lista Serbe ka fuqinë ta shkelë këtë parim themelor?
Procesi zgjedhor në Kosovë po përballet me ndërhyrje sistematike dhe të koordinuara nga Lista Serbe, e cila ka shndërruar votën në një mekanizëm kontrolli politik dhe frikësimi. Në vend që zgjedhjet të shërbejnë si mjet i lirisë demokratike, ato janë shndërruar në një instrument shantazhi dhe manipulimi, ku qytetarët serbë në Kosovë po detyrohen të votojnë jo sipas bindjes së tyre, por për të shmangur pasoja konkrete.
1️. Shantazhi ndaj punëtorëve të sektorit publik
Mësuesit, mjekët dhe punonjësit e tjerë të institucioneve që financohen nga Serbia po detyrohen të votojnë për Listën Serbe. Një “Jo” për këtë listë nënkupton rrezikun e humbjes së vendit të punës dhe përjashtimit nga skemat e mbështetjes financiare. Kjo është shkelje e rëndë e të drejtave themelore dhe dhunim i lirisë së votës.
2. Kërcënimi dhe frikësimi i opozitës serbe në Kosovë
Çdo parti serbe që nuk i nënshtrohet Listës Serbe po përballet me presione të drejtpërdrejta, duke u ndaluar hapësira politike dhe duke u trajtuar si “rrezik” nga strukturat paralele të kontrolluara nga Beogradi. Rasti i kërcënimeve ndaj “Partisë së Serbëve të Kosovës” është dëshmi e qartë se konkurrenca politike është e pamundur pa u përballur me represion.
3. Blerja e votës me fondet e Serbisë
Serbia po përdor ndihmat financiare si mjet për të siguruar mbështetje të plotë për Listën Serbe. 170 eurot që po shpërndahen kryesisht nga veriu nuk janë ndihmë sociale, ato janë mjet për të blerë votën. Çdo qytetar serb, pavarësisht nevojës ekonomike, po thirret në zyrat e strukturave të Listës Serbe dhe po detyrohet të regjistrohet nën një skemë që i lidh drejtpërdrejt me votën e kërkuar. Ky është një mekanizëm i njohur si “Treni Bullgar”, një teknikë e përdorur për të kontrolluar zgjedhjet duke i bërë votuesit të votonin në mënyrë të dirigjuar.
4. Përdorimi i Inteligjencës Artificiale për të manipuluar debatin politik
Shërbimi Informativ Serb (BIA) ka intensifikuar përpjekjet për të ndikuar në perceptimin publik duke përdorur Inteligjencën Artificiale (AI) për të fabrikuar dezinformata dhe për të njollosur figurat politike opozitare. Branimir Stojanovic, Nenad Rasic, Aleksandar Arsenijevic dhe Radojica Radomirovic janë ndër viktimat e këtij sulmi të orkestruar, ku imazhet dhe informacionet e rreme po përdoren për të manipuluar opinionin publik dhe për të penguar alternativat politike ndaj Listës Serbe.
5. Linçimi publik i disidentëve, “Tradhtar” është fjala e re për këdo që mendon ndryshe
Në përpjekje për të ruajtur dominimin politik, Lista Serbe ka krijuar një atmosferë frike dhe përjashtimi ndaj çdokujt që guxon të ketë një qasje tjetër. Serbët në Kosovë që nuk mbështesin këtë strukturë po përballen me linçim publik dhe po etiketohen si “tradhtarë”, duke u ndarë nga komuniteti dhe duke u lënë në izolim politik dhe social.
