Koalicioni AAK – NISMA – KONSERVATORËT – FORUMI INTELEKTUAL E30 – IDEAL mbajti tubimin zgjedhor në Gjakovë, ku liderët e tij prezantuan prioritetet e tyre për zhvillimin ekonomik dhe forcimin e sigurisë së vendit.
Kandidati për kryeministër nga ky koalicion, Ramush Haradinaj, para gjakovarëve u zotua për përfundimin e infrastrukturës rrugore të papërfunduara, përfundimin e hekurudhës për në Durrës, aftësimin e aeroportit dhe ndërtimin e një poligoni ushtarak.
“Ne jemi shumë me fat dhe të gëzum që e kemi Gjakovën që na lidhë me Durrësin, Tiranën, Aeroportin, do ta kryejmë hekurudhën që të vetmen nyje e ka Gjakovën. Do ta aktivizojmë zonën biznesore amerikane. E kemi për fat të mirë aeroportin e dytë të Kosovës në Gjakovë, do ta aktivizojmë për fluturime civile – komerciale. Poashtu kemi paraparë një industri ushtarake në këtë zonë. Edhe diçka, Kampusin Universitar kemi me kry”, premtoi Haradinaj.
Fatmir Limaj, partneri i koalicionit, njëherësh kryetari i Nismës Socialdemokrate, theksoi se tani është koha për të vendosur dhe për t’i thënë po zhvillimit të Kosovës.
“Është koha që të thirrim zërin racional, që të bashkohen energjitë ashtu siç kemi thënë edhe herën e kaluar. Ju falënderoj të gjithëve për këtë angazhim që e kemi pasë, koalicioni po e mbyll këtë fushatë me dinjitet, dhe ashtu siç i ka hije një koalicionit fitues, duke pasë kujdes në gjuhën tonë e duke ftuar njerëz në punë, duke ndarë programin tonë dhe vizitonin tonë”, tha Limaj.
Kryetari i Gjakovës, Ardian Gjini, kandidat për deputet, para bashkëqytetarëve të tij përmendi qëllimet dhe objektivat qeverisëse për të cilat garojnë në këto zgjedhje. “Po garojmë për me qu Kosovën në NATO”, tha mes tjerash ai.
Në këtë tubim elektoral, ndër të tjera, u theksua se ky është koalicioni i vetëm që e kthen Kosovën në binarët e saj.
