Politikanët holandezë kanë reaguar ndaj vendimit të presidentit amerikan Donald Trump për të vendosur sanksione ndaj Gjykatës Ndërkombëtare Penale, me disa të djathtë që kërkojnë largimin e saj nga vendi.
I pari që reagoi ishte kreu i diplomacisë holandeze, Caspar Veldkamp (partia e Kontratës së Re Sociale), i cili tha se Holanda i vjen keq për vendimin e Shtëpisë së Bardhë.“Hollanda shpreh keqardhje për urdhrin ekzekutiv që vendos sanksione ndaj GJNP. Puna e gjykatës është thelbësore në luftën kundër mosndëshkimit. Vendi ynë ka një reputacion dhe përgjegjësi të fortë si vend pritës i institucioneve të rëndësishme juridike ndërkombëtare. Holanda kontribuon aktivisht në forcimin e rendit juridik ndërkombëtar dhe bashkëpunimit shumëpalësh dhe do të përmbushë detyrimet e ligjit ndërkombëtar dhe detyrimet e traktateve në mirëbesim”, tha ministri i jashtëm i vendit.
Ndërsa ky politikan mbështeti punën e gjykatës, djathti holandez Geert Wilders mbështeti Trumpin në këto sanksione.
“A nuk mund të zhvendoset Gjykata Ndërkombëtare Penale në Belgjikë apo diçka tjetër? Unë kurrë nuk e kam kuptuar qëllimin e të pasurit atë institucion këtu,” tha Wilders.
Kujtojmë, presidenti amerikan Donald Trump nënshkroi një urdhër ekzekutiv për vendosjen e sanksioneve kundër Gjykatës Ndërkombëtare Penale (ICC), duke e akuzuar atë për veprime të paligjshme dhe të pabaza të drejtuara kundër Amerikës dhe aleatit të saj të ngushtë Izraelit.
Kjo masë vendos kufizime financiare dhe vizash për individët dhe familjet e tyre që ndihmojnë ICC-në në hetimet e qytetarëve ose aleatëve të SHBA-së.
